Тойм >Сургуулийн тухай

Сургуулийн тухай

Сургуулийн тухай

 

 

 

 

 

 

Эрхэм зорилго

     Олон улсын болон үндэсний эрэлт хэрэгцээнд нийцсэн эрдэм шинжилгээ, боловсрол,  эрүүл мэндийн үйлчилгээ үзүүлдэг, үндэсний тэргүүлэх, Номхон Далайн  Баруун Эргийн Бүсийн анагаах ухааны шилдэг 100 их сургуулийн нэг байхад оршино.

Стратегийн зорилтууд

       НЭЭЛТТЭЙ ИХ СУРГУУЛЬ

   ШИЛДЭГ ИХ СУРГУУЛЬ

          ТОГТВОРТОЙ ИХ СУРГУУЛЬ

     Монгол Улсын дээд боловсролын анхны байгууллага болсон Монгол улсын их сургууль нь Хүн эмнэлэг, Зоо мал эмнэлэг, Багш нарын гэсэн 3 факультеттайгаар 1942 онд байгуулагджээ. Хүн эмнэлгийн факультет анхны төгсөлтөө 1947 онд хийж, 14 их эмчийг бэлтгэн төгсгөсөн. Анхны 14 эмчийн 9 нь төрөлх сургуульдаа багшилсан байна.

     МУИС-ийн Хүн эмнэлгийн факультетийн суурин дээр үндэслэн 20 гаруй тэнхэм, 65 багш, 800 гаруй оюутантайгаар Улсын их сургуулиас туурга тусгаарлан, 1961 онд бие даасан Анагаах ухааны дээд сургууль болсон.

    Эмнэлгийн дээд мэргэжилтэй боловсон хүчин бэлтгэх тухайн цаг үеийн бодлогоор шинээр элсэгчдийг клиникийн эмнэлэгт асрагчаар, тус сургууль төгсөгчдийг туслах эмчээр буюу субординатораар тус бүр 1 жил ажиллуулж, эмнэлгийн практик үйл ажиллагааны анхны мэдэгдэхүүнийг эзэмшүүлж байсан байна.

     БНМАУ-ын Засгийн газраас тогтоосны дагуу өндөр мэргэжилтэй боловсон хүчин бэлтгэх, үндэсний шинжлэх ухааны чадавхийг дээшлүүлэн, улс орны ирээдүйн хөгжилд дээд сургуулиудын оролцоог нэмэгдүүлэх явдал нэн чухал болж байгааг харгалзан их, дээд сургуулиудыг цаашид сургалт, эрдэм шинжилгээний байгууллага болгох зорилгоор Анагаах ухааны дээд сургуулийг 1991 онд Анагаах ухааны их сургууль, 2003-2014 онд Эрүүл мэндийн шинжлэх ухааны их сургууль, Удирдах зөвлөлийн хурлын 2014.02.21-ийн 005 тоот тогтоол, БШУ-ны сайдын 2014.04.09-ны А/134 тоот тушаалаар Анагаахын Шинжлэх Ухааны Үндэсний Их Сургууль болгон өргөжүүлэн зохион байгуулсан.

        Анагаахын Шинжлэх Ухааны Үндэсний Их Сургууль 75 жилийн хугацаанд хүний их эмч, хүүхдийн их эмч, уламжлалт анагаахын их эмч, шүдний их эмч, нүүр амны эрүүл ахуйч нийгмийн эрүүл мэнд судлаач, эм зүйч, био-анагаах судлаач, спортын анагаахын эмч, эрүүл мэндийн эдийн засагч, нийгмийн ажилтан, эрүүл мэндийн мэдээлэл зүйч, сувилагч, бага эмч, эх баригч бага эмч, эм найруулагч, лаборант, рентген техникч, шүдний техникч, эмнэлгийн тоног төхөөрөмж ашиглалт угсралтын техникч, уламжлалт анагаахын бага эмч, уламжлалт анагаахын сувилагч, туслах сувилагч, шүдний эмчийн туслах зэрэг эмч, судлаач, сувилагч, эмнэлгийн мэргэжилтэн бэлтгэн Монгол улсын эрүүл мэндийн салбарын мэргэжилтэй хүн хүчнээр бүрэн хангасан юм.

      АШУҮИС нь өнөөдөр бүрэлдэхүүний болон салбар 10 сургууль, 1000-аад багш, судлаач, ажилтан ажилчин, 12000 орчим оюутан, суралцагчидтай түүхт ойтойгоо золгож байна. АШУҮИС-ийг 2015 - 2024 онд хөгжүүлэх дунд хугацааны хөгжлийн бодлого боловсруулж, Ази, Номхон Далайн Баруун Бүсийн шилдэг 100 их сургуулийн нэг болох эрхэм зорилгоо биелүүлэхээр шамдан хөдөлмөрлөж байна.

      Монгол улсад анх удаа Их Сургуулийн Эмнэлэг, Сургалтын шинэ цогцолбор байгуулахаар төсөл боловсруулж, Япон улсын ард түмний буцалтгүй тусламжаар Монгол Япон Сургалтын Эмнэлгийг барьж 2018 онд, өөрийн хөрөнгөөр Эмнэлэг Сургалтын шинэ цогцолборын эхний хэсэг болох АУС, МАУОУС-ийн хичээлийн шинэ байрыг 2019 онд барьж ашиглалтанд бүрэн оруулах бөгөөд сургалтын цогцолборын II хэсэг 1500 оюутны байр, соёл спортын цогцолбор, багш ажилчдын байрыг 2019 онд барьж эхлэхээр төлөвлөн ажиллаж байна. Энэ цогцолборыг ашиглалтанд оруулснаар Их сургуулийн цогцолбор Монгол улсад анх удаа бий болгох юм.

        АШУҮИС-ийн багш, эрдэмтэн судлаачдын хамтын хөдөлмөрийн дүнд хүний их эмч бэлтгэх хөтөлбөр Олон улсын эрх бүхий ASIIN байгууллагаар магадлан итгэмжлүүлж анагаах ухааны боловсрол нь олон улсын түвшинд албан ёсоор хүлээн зөвшөөрөгдөж, гадаадын олон улс орнуудаас оюутан залуус элсэн суралцдаг, төгсөгчид нь дэлхийн аль ч улс оронд сурч, ажиллах эрхтэй болж Монгол улсын дээд боловсролын нэрийн хуудас болсон үндэсний шилдэг их сургууль болж чадсан юм.

         Улсын төсвийн болон өөрийн хөрөнгөөр их сургуулийн цөм лабораторийг байгуулж, судалгаа шинжилгээний орчин үеийн багаж, тоног төхөөрөмжөөр хангаж ажилласны үр дүнд тус сургуулийн профессор, багш, судлаачид олон улсын нэр хүндтэй шинжлэх ухааны ном, имфакт фактор өндөртэй сэтгүүлд АШУҮИС нэрээр хаягласан шинжлэх ухааны үнэ, цэнэтэй бүтээлүүдийг туурвидаг болжээ. Дэлхийн шилдэг сэтгүүл болох Nature сэтгүүлд АШУҮИС- ийн нэрээр анх удаа өгүүлэл хэвлэгдсэн нь тус сургуулийн эрдэм судлалын ажил олон улсад үнэлэгдэж байгаагийн илэрхийлэл юм.

     Гадаад харилцааг сайжруулж дэлхийн 100 гаруй их сургууль, олон улсын байгууллагуудтай тогтвортой хамтын ажиллагааг хөгжүүлж бодит үр дүнд хүрсээр байна. Эмч багш, мэргэжилтнүүд нь Монгол улсын эрүүл мэнд, боловсрол, шинжлэх ухааны салбарын тэргүүлэх мэргэжилтэн болж, Академич, Монгол улсын Хөдөлмөрийн баатар, Төрийн соёрхолт, Ардын болон Гавьяат цолтон зэрэг ард түмэндээ хөдөлмөр бүтээлээрээ танигдсан, мэргэжлээрээ овоглуулсан эрдэмтэн, мэргэдтэй эх орныхоо нэрийг оюуны бүтээл, чадлаараа дэлхий дахинд дуурсгасан бүтээлч, хөдөлмөрч хамт олон билээ.