Эрүүл мэндийн тусламж үйлчилгээндээ оношилгоо эмчилгээний өндөр хүчин чадалтай тоног төхөөрөмжид суурилсан эрүүл мэндийн тусламж үйлчилгээг эмч, багш нарын мэргэшсэн багаар үзүүлдэг ба энэхүү үйл ажиллагааг өргөжүүлэх, бүх нийтийн эрүүл мэндийн хамрагдалтыг дэмжих, эрүүл мэндийн тэгш хүртээмжтэй байдлыг хангах зорилгоор их сургуулийн эмнэлгүүдэд доорх төсөл, хөтөлбөрийг амжилттай хэрэгжүүлж байна. Үүнд: 

1.1 Бүгд Найрамдах Австри Улсын хөнгөлөлттэй зээлийн хүрээнд “Харьяа эмнэлгүүдийн тоног төхөөрөмжийг шинэчлэх” төсөл

Монгол Улсын Засгийн газар, Бүгд Найрамдах Австри Улсын Засгийн газар хоорондын Санхүүгийн хамтын ажиллагааны хэлэлцээрийн хүрээнд АШУҮИС-ийн эмнэлгүүдийн тоног төхөөрөмж нийлүүлэх төслийг Засгийн газрын 2021 оны 271 дүгээр тогтоолоор баталсан. 2023 оны 3-р сарын 21-ний өдөр Бүгд Найрамдах Австри Улсын Вена хотод эдийн засгийн хамтын ажиллагааны Монгол, Австрийн засгийн газар хоорондын комиссын 8-р хуралдаанаар АШУҮИС-ийн эмнэлгүүдийн тоног төхөөрөмжийг шинэчлэх 7,5 сая еврогийн төслийг АШУҮИС-ийн Төв эмнэлэг, Монгол анагаах ухааны төв эмнэлэг, Нүүр ам судлалын төв эмнэлгүүдэд хэрэгжүүлэхээр шийдвэрлэсэн. 

Төслийн хүрээнд АШУҮИС-ийн Төв эмнэлэгт дүрс оношилгооны тоног төхөөрөмж, ходоод гэдэсний дурангийн тоног төхөөрөмж, эмнэлзүй, нян судлал, молекул оношилгооны лабораторийн тоног төхөөрөмж, орчин үеийн өндөр түвшний мэс засал хийх  вакум хагалгааны орчин, эмнэлгийн хийн систем, бүх төрлийн хагалгаа хийх дурангийн багаж тоног төхөөрөмж, эмнэлгийн  ариутгал угаалгын тоног төхөөрөмжийг нийлүүлсэн. 

Монгол улсад анх удаа АШУҮИС-ийн Нүүр ам судлалын төв эмнэлэгт нүүр амны согог заслын дижитал лабораторийн тоног төхөөрөмж, нүүр амны гажиг заслын дижитал лабораторийн тоног төхөөрөмжийг нийлүүлсэн явдал нь төгсөлтийн өмнөх, дараах сургалтаар эмч нарыг мэргэшүүлэх, энэ чиглэлийн тусламж үйлчилгээг ард иргэд авах боломжийг нэмэгдүүлсэн онцгой ач холбогдолтой юм. 

АШУҮИС-ийн Монгол анагаах ухааны төв эмнэлэгт уламжлалт эмчилгээ, спортын гэмтлийн үеийн эмчилгээний тоног төхөөрөмж, дүрс оношилгооны тоног төхөөрөмж, эмнэлзүйн лабораторийн тоног төхөөрөмжийг нийлүүлсэн. 

1.2 “Анагаахын Шинжлэх Ухааны Үндэсний Их Сургуулийн Монгол-Японы Эмнэлгийн 350 ортой өргөтгөлийн барилга барих” төсөл

Төсөлд эмнэлгийн барилгыг хүлээж авах, зайлшгүй шаардлагатай тоног төхөөрөмж суурилуулж дуусгах, эмнэлгийн хүний нөөцийг чадавхжуулж, менежментийг төгөлдөршүүлэх гэсэн 3 үндсэн үйл ажиллагааг тусгасан ба их сургуулийн эмнэлгийн тэргүүлэх чиглэлүүдэд тулгуурлан төрөлжсөн мэргэжлийн эмч 64, сувилагч 144, бусад 39, нийтдээ 247 эмнэлгийн мэргэжилтэн бүрдүүлэн ажиллах, ба тусламж үйлчилгээ үзүүлэхэд зайлшгүй шаардлагатай 164 нэр төрлийн 672 ширхэг багаж тоног төхөөрөмж, 350 ширхэг өвчтөний ортой байхаар төлөвлөж байна. Эмнэлэг нь жилд дунджаар 11000 үйлчлүүлэгчийг төрөлжсөн мэргэжлээр (дотор, мэдрэл, мэс засал, хүүхэд, эмэгтэйчүүд,  эрүү нүүрний мэс засал, гэмтэл, сэргээн засах, хөнгөвчлөх) хэвтүүлэн эмчилж, 4800-5200 хүнд мэс заслын тусламж үзүүлж, амбулаторийн үндсэн болон төрөлжсөн мэргэжлийн 24 кабинет, оношилгооны 8 кабинет, нэгдсэн лабораториор хоногт дунджаар 600 орчим хүнд, жилд 150,000 орчим хүнд тусламж үйлчилгээ үзүүлэх хүчин чадалтай байна. Урьдчилан сэргийлэх, нийгмийн эрүүл мэндийн тусламж үйлчилгээг хот, орон нутгийн үйлчлэх хүрээний бүх хэсэг нэгжүүдэд хүргэж ажиллах зорилтыг тавьсан. 

1.3 “Нярайн скрининг шинжилгээний төв” байгуулах төсөл 

2023 оны 01 дүгээр сарын 31-ний өдөр НҮБ-ын Хүүхдийн сангийн дэмжлэгтэйгээр АШУҮИС-ийн Төв эмнэлэгт “Нярайн скрининг оношилгооны төв” нээлтээ хийсэн. Тус төв нь нярайд 5-7 төрлийн эмгэгийг эрт илрүүлэх скрининг шинжилгээ хийснээр хүүхдийн хөгжлийн бэрхшээлээс сэргийлж, чанартай амьдралыг бий болгох, удмын санг цэвэр авч үлдэх зорилготой юм. Нээлтээ хийснээс хойш нийт Улаанбаатар хотын амаржих газруудаас 4,095, хөдөө орон нутгаас 3,898, нийт 7,993 хүүхдийн цусны дээжинд шинжилгээ хийж 3 эмгэгтэй нярайг эрт илрүүлж, хяналтдаа аваад байна. Түүнчлэн 2023 оны 9 дүгээр сарын 15-ны өдөр Ховд аймгийн БОЭТ-ийн хүүхдийн клиникийн дэргэд нярайн скринингийн төвийн салбарын байгуулав. Цаашид 2023 оны 11 дүгээр сарын 22-ны өдөр Дорнод аймгийн бүсийн оношилгоо эмчилгээний төвийн хүүхдийн тасгийг түшиглэн нярайн оношилгооны төвийг байгуулахаар бэлтгэл ажлаа хангаж байна. 

1.4 Монгол анагаах ухааны төв эмнэлгийн харьяа Эрхэс сувиллын өргөтгөлийн ажил 

Эмнэлгийн тусламж үйлчилгээний хүлээлтийг багасгах, хэвтэн эмчлүүлэх орны тоог нэмэгдүүлэх зорилгоор Монгол анагаах ухааны төв эмнэлгийн харьяа Эрхэс сувиллыг өргөтгөж, 4 улирлын 100 ортой эмнэлгийн барилгын ажлыг эхлүүлсэн ба 2024 оны 2 дугаар улиралд ашиглалтад оруулахаар ажиллаж байна. 

2. Их сургуулийн эмнэлгийн тогтолцоог цогцоор хөгжүүлэх, Монгол Улсын эрүүл мэндийн салбарт чадварлаг эмч, эмнэлгийн мэргэжилтний төгсөлтийн өмнөх, төгсөлтийн болон төгсөлтийн дараах сургалтад бэлтгэхэд хамтран ажиллах  зорилгоор жил бүр үндэсний лавлагаа шатлалын эмнэлгүүд, нэгдсэн эмнэлгүүд, амаржих газрууд, дүүргийн нэгдсэн эмнэлгүүд, хувийн хэвшлийн эмнэлгүүдтэй хамтын ажиллагааны гэрээ байгуулдаг. 

Үүний дүнд төгсөлтийн өмнөх дадлага тойролт, төгсөлтийн дараах үндсэн мэргэжил, төрөлжсөн мэргэшлийн тойролтыг эмнэлэгт түшиглэн хийж, эмч, мэргэжилтний ур чадвар, чадавхыг нэмэгдүүлдэг ба тухайн эмнэлгүүдийн эмч, мэргэжилтний эрдэм судлалын ажлыг их сургуулийн зүгээс дэмжих, их сургуулийн эрдэмтэн багш нар тухайн эмнэлгүүдэд орчин үеийн анагаах ухааны шинэ технологи, эмнэлзүйн шинэчлэгдсэн удирдамжийн  сургалтыг тогтмол хийх зэрэг олон талын ач холбогдолтой юм.